Applus ITV

Applus+ logra a adxudicación das ITV en Irlanda por outros dez anos

Applus asinou o contrato para a Inspección Técnica de Vehículos (ITV) en Irlanda por un período de 10 anos a contar desde xullo de 2020, segundo notificou a Irish Road Safety Authority, o que informou a compañía á Comisión Nacional do Mercado de Valores (CNMV).

Applus tiña adxudicado ata mediados de 2020 o contrato de ITV de Irlanda, que representou o 4,7% dos seus ingresos totais en 2018.

A Irish Road Safety Authority convidou a Applus a presentarse á licitación para volver prestar os servizos de ITV durante outros dez anos, entre xullo de 2020 e xullo de 2030, petición que a compañía atendeu, presentando a súa oferta o pasado 7 de marzo.

Applus recibiu a finais de xuño unha notificación de que a súa oferta era a máis vantaxosa economicamente e finalmente, tras obter a puntuación máis alta da licitación, logrou de novo o contrato.

David Cañás: “No meu traballo son coma un doutor dos sistemas eléctricos”

Pregunta para nota. E resposta de sobresaliente. Se para calquera traballador pode resultar complicado definir o seu día a día, para unha persoa como David Cañás, un coruñés de 45 anos que é responsable de ensaios eléctricos nunha empresa líder no mercado por axudar aos seus clientes para potenciar a calidade e a seguridade dos seus activos, a cousa complícase. E moito. En plena revolución tecnolóxica, este enxeñeiro formado en Electrónica na Escola Politécnica Superior de Ferrol explica cun símil moi ben traído, que os profanos poderán entender á perfección, a rutina -se se pode dicir que a ten alguén que conta con proxectos en todo o mundo- do seu labor. «Formo parte dun equipo de doutores de sistemas eléctricos; os pacientes veñen pedir un diagnóstico se teñen algunha dúbida sobre obras novas ou problemas de consultoría e facémoslles os electrocardiogramas e as analíticas á aparamenta de alta tensión. Despois dicímoslles que ocorre». Tras vinte anos na profesión, e sempre ao servizo de Applus, incide na calidade da enxeñería española e a adaptación ás enerxías renovables.

-Leva vinte anos traballando en Applus, unha das compañías líderes no ámbito dos servizos de inspección, ensaios e certificación. Nunca lle tentou coller outro camiño?

-Tiven ofertas desde que empecei nesta compañía, á que cheguei para facer prácticas en 1999, e no 2002 xa me convertín, con 28 anos, en xefe de proxecto. Pero tomei unha decisión, que foi apostar por esta empresa e creo que acertei. Estou moi contento e déronme grandes oportunidades.

Entrevista completa en La Voz de Galicia

Syc-Applus+ e Castrosua firman un acordo para a revisión dos sistemas de climatización dos seus autobuses

O Laboratorio de Frío de Galicia de SyC- Applus+ asinou un convenio de colaboración coa empresa galega Castrosua co obxectivo de efectuar ensaios dos sistemas de aire acondicionado e antivaho de autobuses carrozados, destinados a clientes de zonas con temperaturas ambientais elevadas.
Este acordo atópase enmarcado dentro da liña de I+D+i que SyC- Applus+ puxo en marcha para posicionar o Laboratorio como Centro Tecnolóxico do Frío e que, desta maneira, poida colaborar con empresas, universidades, e outras entidades da nosa comunidade para a realización de ensaios e/ou probas que poidan requirir do emprego das súas instalacións.
O Laboratorio de Frío de Galicia, situado no recinto da estación de ITV de Espírito Santo (Sada), é o único centro oficial de ensaio para vehículos de transporte de produtos perecedoiros do norte de España. No seu ciclo de vida, os vehículos destinados ao transporte de perecedoiros deben someterse a estritos controis tanto por parte das OCA (organismos de control), como na propia inspección técnica de vehículos. No laboratorio de frío desenvólvense os ensaios necesarios para avaliar o estado dos contedores de temperatura controlada necesarios para a súa homologación.
Tras iniciar a súa actividade en febreiro de 2018, completou o seu primeiro ano de maneira moi satisfactoria cumprindo con éxito os obxectivos propostos. A súa posta en marcha responde a unha vella demanda do sector, permitindo aos transportistas galegos e das comunidades limítrofes desenvolver todos os controis que contemplan o Acordo Internacional de Transporte de Mercadorías nas mesmas instalacións de Espírito Santo.
Na actualidade, o Laboratorio continúa co seu crecemento, aspirando a converterse nun referente non só en Galicia, senón tamén a nivel nacional e contribuíndo ao obxectivo de SyC- Applus+ de prestarlle á sociedade galega servizos de calidade no ámbito da automoción, nos que se combinen adecuadamente a innovación tecnolóxica e a proximidade e profesionalidade no trato ao cliente.
O Laboratorio de Frío de Galicia de SyC- Applus+ conta coa acreditación de ENAC Nº 1267/LLE2411 segundo a norma internacional UNE-EN ISO/ IEC 17025 para a realización de ensaios de medida e/ou verificación do coeficiente global de transferencia de calor “ K” que caracteriza a isotermia dos vehículos de transporte de mercadorías perecedoiras. Ademais, foi designado polo Ministerio de Industria como estación oficial de ensaios ATP.
A instalación, equipada cunha tecnoloxía de vangarda, consiste nunha cámara de ensaio de 26 metros de lonxitude, na que se avalía a capacidade illante das unidades isotermas, que inclúe desde os sistemas de climatización do habitáculo ata a refrixeración dos motores, a resistencia ao vento e a capacidade illante dos vehículos isotérmicos. A tecnoloxía empregada polo Laboratorio, baseada na transmisión inalámbrica dos rexistros, permite a automatización da toma de datos e a obtención dos resultados dos ensaios para axilizar os procesos na emisión do Certificados ATP.

Applus+ Galicia prepara a persoas con discapacidade intelectual para acceder a un emprego

A Federación Galega de Asociacións en favor dás Persoas con Discapacidade Intelectual ou do Desenvolvemento, denominada Fademga Plena inclusión Galicia, e a empresa Applus+ Norcontrol, unha das sedes galegas da multinacional Applus+, iniciaron este ano unha colaboración que xa permitiu a catro persoas con discapacidade intelectual ter a oportunidade de prepararse para o mundo laboral nas instalacións desta empresa.

Durante un mes, e mediante a metodoloxía de emprego con apoio, este grupo puido desempeñar distintas tarefas de ordenanza, e coñecer en primeira persoa a contorna laboral da empresa ordinaria, máximo expoñente da inclusión laboral.

Tal e como asegura o presidente de FADEMGA Plena inclusión Galicia, Eladio Fernández, “o mercado laboral non terminou de descubrir o talento que poden achegar as persoas con discapacidade intelectual. Aínda queda moito por facer e en moitos casos, a pesar da valía destas persoas, as empresas non acaban de darlles a oportunidade de demostrar as súas capacidades”. Desde hai anos, Applus+ desenvolve en Galicia numerosas iniciativas enmarcadas na filosofía de devolver á sociedade parte do que nos dá. Neste ámbito, a principal aposta é o proxecto “Sen Límites”, que promove a incorporación de persoas con diversidade funcional na empresa ordinaria. Na actualidade, Applus+, pioneira na comunidade nunha experiencia deste tipo, conta no seu persoal do territorio galego con 29 empregados con discapacidade intelectual.

O emprego con apoio

FADEMGA Plena inclusión Galicia é pioneira no desenvolvemento da metodoloxía de emprego con apoio, a través da que un preparador laboral acompaña e axuda á persoa con discapacidade intelectual a desenvolver as súas tarefas no novo posto.

O preparador laboral apoia non só ao traballador, senón á empresa que o integra. Un apoio que vai desaparecendo na medida que a persoa coñece ben as tarefas para desenvolver e segundo van aparecendo os apoios naturais que son aqueles que proporcionan os propios compañeiros de traballo.

Prexuízos, estereotipos, a falta de experiencias previas… grazas ao emprego con apoio, en FADEMGA Plena inclusión Galicia axudamos á empresa para vencer estes escollos, mostrándolles as vantaxes que ten a incorporación de persoas con discapacidade intelectual na empresa ordinaria á vez que contribuímos á inclusión laboral do colectivo.

Applus+ Galicia, mejor empresa de la eurorregión España-Portugal en políticas de igualdad

Applus+ Galicia, formada por SyC Auto e Energy & Industry, recibirá o martes 18 de xuño, na sede da Universidade de Porto (Portugal), o Primeiro Premio de Igualdade de Oportunidades nos Premios Transfronteirizos. O galardón abarca o territorio das rexións de Galicia, Estremadura, Castela e León e Norte de Portugal. O obxectivo desta distinción é recoñecer as traxectorias máis destacadas no ámbito da implantación de políticas de conciliación e igualdade.

En concreto, os Premios Transfronteirizos de Conciliación e Igualdade están orientados a aspectos como as iniciativas relacionadas coa xestión do tempo, a flexibilidade e o equilibrio da vida laboral e persoal, así como aquelas dirixidas á participación en igualdade de dereitos de mulleres e homes.

A división galega de Applus+ foi galardoada na categoría do Recoñecemento á Igualdade de Oportunidades, grazas a un proxecto baseado nas diferentes iniciativas e medidas que a compañía puxo en marcha co obxectivo de contribuír ao recoñecemento da diversidade, a procura da igualdade de oportunidades e a integración social así como a adaptación dos procesos de xestión e a coordinación responsable dos traballadores.

Entre os eixes fundamentais deste proxecto destaca a recente creación do Consello de Conciliación e Igualdade, pioneiro en Galicia, co obxectivo de garantir o uso de políticas de conciliación dentro das relacións laborais. Todo iso compleméntase con medidas de sensibilización e que fomenten a promoción xerárquica, como o Programa Shadowing con directivas. En definitiva, iniciativas e accións que propician a promoción da igualdade efectiva entre homes e mulleres en todos os ámbitos relacionados coa actividade que Applus+ desenvolve.
O pasado mes de febreiro, a multinacional tamén foi recoñecida co galardón do Top Employer Institute, unha entidade internacional que cada ano elabora unha lista das mellores prácticas laborais. En España foron seleccionadas un total de 94 empresas, entre as que se atopaba Applus+.

A multinacional Applus+ conta con 22.800 profesionais, está presente en 70 países e posúe 350 oficinas e laboratorios. En Galicia atópase unha das súas sedes principais. As distintas divisións implantadas na comunidade galega abarcan desde inspección industrial, coa sede de Applus+ Norcontrol na Coruña, laboratorios en Sada e oficinas en Ourense e Pontevedra, así como en enxeñería do automóbil, co Centro Tecnolóxico de Automoción de Galicia, e a inspección técnica de vehículos, coa rede de estacións de ITV, que xestiona SyC Applus+.

A obtención desta distinción encaixa nas liñas mestras da acción de responsabilidade social que exerce a compañía, que trata de facilitar aos seus traballadores a igualdade de oportunidades e a conciliación da súa vida persoal e laboral. No ámbito do desenvolvemento profesional, a filosofía de Applus+ sempre foi facer crecer e desenvolver o talento en todos os niveis da organización, optimizando continuamente o crecemento profesional e persoal dos seus empregados.

Raquel Grandal: “Os empregados felices fan empresas exitosas”

A conciliación converteuse nun dos principais cabalos de batalla no mercado laboral. As empresas que xa probaron este tipo de políticas certifican a súa eficacia con datos. SyC Applus+ é unha delas. Consciente da importancia destas medidas, a empresa deu un paso adiante e acaba de estrear o seu Consello de Conciliación, un organismo pioneiro en Galicia co que se pretende seguir camiñando pola senda da igualdade. «Ter implantadas estratexias de conciliación familiar dentro da organización tradúcese en empregados máis felices e iso, ao final, reverte no ben da empresa», sentenza Raquel Grandal, nomeada responsable deste órgano.

-Cal son as liñas mestras do Consello de Conciliación creado por SyC Applus+?

-O obxectivo que persegue é a incorporación, dentro da cultura da compañía, das estratexias de conciliación familiar, laboral e persoal. Buscamos que as persoas que forman a empresa teñan unha mellor calidade de vida. É un punto clave para conseguir aproveitar o potencial do persoal. Porque os empregados felices fan empresas exitosas.

Entrevista completa en La Voz de Galicia

Applus+ Galicia impulsa unha iniciativa pioneira cos seus Consellos de Conciliación e Igualdade

A multinacional Applus+ acaba de dar un paso máis nas súas políticas de relacións laborais, cunha iniciativa xurdida precisamente en Galicia, e que nace como pioneira na comunidade. Os novos Consellos de Conciliación e Igualdade, que nacen de forma paralela tanto en SyC Applus+ como en Applus+ Norcontrol, son órganos relacionados directamente coa dirección das empresas que compoñen o grupo en Galicia, e cuxa misión é deseñar as políticas de conciliación e igualdade como eixe transversal á súa estratexia empresarial.

Os consellos de conciliación de ambas as empresas están constituídos por representantes destacados dos diferentes departamentos, e presidida no caso de SyC Applus+, concesionaria da inspección técnica de vehículos en Galicia, por Raquel Grandal, directora de Produción da empresa. En Applus+ Norcontrol o cargo recaeu en María Louzao, directora de zona noroeste da división Energy & Industry en España.

Ambas directivas desenvolveron unha importante traxectoria nas súas empresas, e asumiron este compromiso, que se consolida tras un proceso de sensibilización e concienciación sobre a conciliación familiar e laboral no seo das súas empresas, que son singulares polo seu perfil altamente técnico, e que conta con todo con numerosas mulleres en postos de alta responsabilidade.

Entre os obxectivos destes órganos, que actualmente están a desenvolver as primeiras reunións para deseñar a súa folla de roteiro, está avanzar nos protocolos xa iniciados en anteriores plans de igualdade, co fin de previr situacións de discriminación ou acoso por razón de xénero, planificar medidas que garantan a igualdade de oportunidades no ámbito da promoción interna, así como a conciliación familiar e laboral tanto en caso de traballadoras como traballadores.

Co fin de garantir a transparencia e a participación de todo o cadro de persoal das empresas e transmitir á dirección as recomendacións e solucións para minimizar as barreiras procedentes de todos e cada un dos departamentos, en cada consello dispúxose unha caixa de correos de suxerencias ao que pode presentar as súas propostas calquera traballador.

Applus+ é unha das compañías líderes mundiais en inspección, ensaios e certificación. Desenvolve a súa actividade en máis de 70 países, cotiza nas bolsas de Madrid, Barcelona, Valencia e Bilbao, e emprega a máis de 22.800 persoas. Galicia é actualmente un dos seus eixes estratéxicos de expansión, con máis de 1.000 postos de traballo repartidos nos centros de operacións e oficinas pertencentes ás divisións de Laboratories, Automotive e Energy & Industry. Ademais do ámbito de inspección industrial, no que o grupo ten unha gran presenza en obra pública e privada a través de Applus+ Norcontrol, con central en Sada, un dos sectores estratéxicos é precisamente o do automóbil, tanto no ámbito de I+D+i como en inspección.

En innovación destaca o Centro Tecnolóxico de Automoción de Galicia, que conta como socio tecnolóxico con Applus+ Idiada e ten a súa sede no Porriño. En canto a inspección técnica de vehículos, SyC- Applus+ xestiona toda a rede de estacións na comunidade, composta por un total de 26 centros fixos e 10 móbiles. Ademais, a través dun proxecto de investigación en colaboración coa Universidade da Coruña desenvolveu un innovador modelo de estación, baseado na arquitectura modular e a automatización de procesos, que se converteu nun modelo para o seu desenvolvemento noutros mercados.

Premio José Luis Alvite para Carlos Luis Rodríguez, director de comunicación de Syc Applus

 A Asociación de Periodistas de Galicia (APG) acordou por unanimidade outorgar o Premio de Columnismo José Luis Alvite ao xornalista Carlos Luis Rodríguez, director de comunicación de SyC Applus. A ampla traxectoria do galardoado está ligada con El Correo Gallego, xornal onde Rodríguez desenvolve, dende hai máis de quince anos, a súa actividade como columnista de xeito habitual.

Ademais disto, o xornalista encargouse da direción e presentación de programas de entrevistas e debates na Televisión de Galicia. Así mesmo, Rodríguez foi dos primeiros reporteiros españois en falar con Yaser Arafat e con outras personalidades de renome internacional como Mario Vargas Llosa, Jacques Delors ou Mario Soares.

Á hora de distinguilo con este galardón, que alcanza a súa cuarta edición, a directiva da APG destacou “a súa capacidade de argumentar con rigor e moderación, con artigos nos que achega un estilo áxil e claro”.

La Voz de Galicia

A maioría das inspeccións a coches detectan o mal estado das rodas

As rodas gastadas ou con reformas e parches sen autorizar son o principal defecto que os inspectores da Policía Local de Vigo detectan nos controis aleatorios que realizan na cidade para revisar o estado dos vehículos, ver fallos mecánicos ou administrativos e denunciar aos infractores. Os axentes presentaron 124 denuncias por danos en vehículos no 2018 e un terzo (43) delas debíanse a que o condutor circulaba con fallos nas rodas, o que supoñía un risco para eles mesmos e para o resto dos usuarios da vía.

Así o revela o informe Sintra do 2018 da Sección de Inspección de Transporte da Policía Local de Vigo. Os motivos mecánicos secundarios polos que os condutores son sancionados son por danos na carrocería (13), irregularidades co espello retrovisor (10), o tubo de escape (7) e a dirección e as luces (6). Só se localizaron dous coches cos freos mal. Os axentes tamén revisan os papeis do vehículo e descubriron que en tres casos, o titular xa falecera e noutros cinco, o transporte xa fora dado de baixa. Seis deles tiñan problemas coa matrícula.

Artigo completo en La Voz de Galicia