Dende a súa posta en funcionamento, o 5 de xullo de 2012, a estación da ITV instalada no polígono de O Allo non parou de medrar tanto en número de revisións de vehículos como na creación de postos de traballo. Durante estes escasos sete anos de funcionamento leváronse a cabo 257.000 inspeccións e o número de traballadores incrementouse nun 250%, xa que pasou de 4 a 14.

Manuel Muíño Espasandín, alcalde de Zas, puxo de manifesto a importancia do servizo para o municipio e para toda a Costa da Morte. “A ITV foi un dos investimentos máis importantes da historia do noso concello, pero, máis alá do desembolso económico, a importancia do servizo radica en que creou postos de traballos directos e indirectos e evita o trastorno que lle supoñía á veciñanza desprazarse até Arteixo ou Santiago de Compostela para realizar un trámite tan importante para a seguridade viaria como é a inspección técnica dos seus vehículos”.

Preto de 12.000 revisións no que vai de 2018
Ano a ano, o número de inspeccións na ITV de O Allo medra de forma exponencial. O 68,52% das inspeccións realizadas dende os inicios corresponden a turismos; case o 19% a vehículos de mercadorías lixeiras, tales como furgóns e furgonetas de menos de 3.500 quilogramos, e case o 5% das inspeccións realizáronse a vehículos agrícolas.

Como consecuencia do aumento do volume de revisións tamén se incrementaron considerablemente o número de postos de traballo directos. A estación de O Allo abriu con dúas liñas de inspección directas –unha de turismos e outra universal– e cun equipo formado por catro persoas –tres encargadas da realización das inspeccións e unha da área administrativa–. 
Actualmente, a estación de O Allo conta cunha plantilla formada por 14 persoas –dez encargadas da inspección en nave, tres administrativas e un ordenanza que pertence ao proxecto de integración laboral de persoas con discapacidade intelectual Son Capaces–. O horario actual de atención ao público é de luns a venres, de 08.00 a 21.00, e os sábados de 08.00 a 14.30 horas, o que supón un total de 71 horas e media de atención ao público á semana.

Cada vez tamén se amplía máis a área de procedencia dos clientes, que chegan dende toda a comarca de Soneira e de moitos outros puntos da de Bergantiños e Xallas. Carballo, Mazaricos, Santa Comba e incluso Muros son algúns dos puntos xeográficos dende os cales se desprazan.

A partir de maio haberá cambios nos controis da ITV. Todos os países da Unión Europea van ter que seguir unha mesma normativa.

O tema que creou máis expectación foi o do control das emisións de gases. Está previsto facer novos controis, máis estritos. Para reducir a contaminación, pero tamén para evitar a fraude e o engano. De todos xeitos este punto non entrará en vigor ata o vindeiro ano.

Noticia completa na TVG

Os representantes do comité de marketing e comunicación de Applus, reunidos na Cidade dá Cultura de Galicia no seu encontro anual, recibiron a visita do conselleiro de Economía, Emprego e Industria, Francisco Conde. O conselleiro reuniuse cun o equipo de responsables destas áreas nas distintas delegacións que Applus ten en todo o mundo, encabezado por tres vicepresidentes do Grupo Applus, José Delfín Pérez Fernández, Jorge Lluch e Aston Swift.
O conselleiro subliñou a importancia de que Applus decida organizar este encontro por primeira vez en Galicia, onde a multinacional conta cunha importante presenza, reforzada pola recente incorporación de Supervisión e Control, concesionaria do servizo de inspección técnica de vehículos en Galicia.
Francisco Conde puxo sobre a mesa os retos da Galicia do futuro, nos que Applus desenvolve un papel moi importante, como compañía líder mundial en inspección, ensaios e certificación. Actualmente, Applus xera máis de mil postos de traballo na comunidade, con destacadas actividades como a que desenvolve Applus Norcontrol, na localidade de Sada, ou a propia rede de estacións de ITV de Galicia, que co seu desenvolvemento tecnolóxico, as súas dotacións de vangarda e os seus protocolos innovadores consolidou o Modelo Galego de ITV, exportándoo a outros países.

Applus ten apostado firmemente por este modelo, que o conselleiro valorou como un dos grandes activos no tecido industrial e no campo do I+D en Galicia. Tras as sesións de traballo, os participantes no encontro visitaron as instalacións de Applus en Galicia. Entre elas figuran os laboratorios químico, de construción e de análise de fallos, situados na sede de Applus Norcontrol, en Sada (A Coruña). Nesta mesma localidade, fixeron un percorrido pola estación de Inspección Técnica de Vehículos de Espírito Santo, sede central de SyC ITV-Applus. Posteriormente, desprazáronse á estación de ITV da Sionlla, en Santiago de Compostela, a primeira dunha xeración de estacións con tecnoloxía modular.
Con máis de 19.000 empregados e presenza en 70 países, Applus conta en Galicia con actividade en varias divisións, que abarcan desde inspección industrial, coa sede de Applus Norcontrol na Coruña, laboratorios en Sada e oficinas en Ourense e Pontevedra, así como en enxeñería do automóbil, co Centro Tecnolóxico de Automoción de Galicia, en Porriño, e agora tamén a inspección técnica de vehículos, con SyC-ITV, que conta con 26 estacións fixas repartidas por toda Galicia, así como 10 estacións móbiles.